Author Archives: oldman

今年好似熱過上年

熱咗一排,終於涼番幾日,以為可以去晨運,點知又到空氣污染。如果朝候早冇睇天氣就咁出街,係幾涼幾舒服嘅,但由於安省北部山火嘅關係,空氣質素有時唔係幾好。吸太多pm2.5(即係細微粒)入肺就唔係幾好喇,pm2.5對腦袋心臟皮膚都唔好。聽講除非戴N95,否則一般口罩幫助唔大,除非係要揾食返學,退休人士都係免得過就免留喺屋企好啲,記得連窗都儘量唔好開。

比起上年,今年年頭冷得耐,記得上年三月中已經唔係好凍,可以出去晨運,今年等到差唔多五月尾,先至開始去晨運。今年又真係幾熱,早排有幾次heat warning(高溫警告),真係好熱。有一次唔覺意走咗出去,嘩,大鑊啦,感覺好似喺一個大火爐入面比火爐slow cooking,吸入嘅空氣係滾熱辣,勢色唔對路,都係調轉頭返屋企。所以如果遇著温度高再加上空氣差嘅日子,真係唔係幾盞。喺香港嘅話,可能馬上揾個冷氣商場走入去涼冷氣,喺呢度北美喺條街度冇遮冇掩冇埞匿,好似特別熱。當然久唔久仲聽見有人話全球暖化氣候變化係假嘅,熱成咁都話係假嘅,真係腦子有病。

話說天氣熱,好多人都唔想自己煮野食,寧願出街食飯又或者買街野食,我發覺喺多倫多有唔少賣熟食賣外賣嘅地方,尤其係規模比較細嗰啲,天氣熱生意又可能唔多好,用剩嘅食材又唔捨得丟,有好幾次食完呢啲地方嘅野覺得唔多妥。唔好以為規模大嗰啲,又一定冇問題。屋企附近,有間幾大嘅超市嘅某間分店個熟食部又係唔係幾掂,好多年前行過佢嘅肉食部,生意唔錯,顧客係要排隊嘅,最近去過幾次,次次去都唔見人幫襯,剩係聞到一陣肉臭味,係咪衛生做得唔夠好,啲肉賣唔去,你話啲肉去咗邊,應該有一部份去咗熟食部囉,醃重手啲炸耐啲,食你唔死算你好彩,當然應該仲有其他出貨門路。大熱天時,食野都係小心啲好。

做白內障痛唔痛嘅呢?

未做之前問過幾個人,唔知係認叻定係點,嗰嗰都話唔痛。睇睇網上有關做白內障嘅資料,都係話應該唔會太過痛,最多係感覺到手術進行中有啲嘢走出走入,所謂嘅微創手術咁話。

唔知點解,第一次做白內障嘅時候,覺得非常之痛,係麻醉藥唔夠定係打得唔好,唔知道,專科醫生仲話做得幾好,冇解。今年年頭做第二次白內障,今次又真係唔係幾痛,可以話算唔痛,分別係乜嘢呢?第一次做白內障嘅時候,記得係由專科醫生帶住過實習醫生做,第二次係專科醫生自己做,係唔係實習醫生未夠料呢,唔知道,有機會梗係揾專科醫生操刀啦,不過又好似唔到患者自己話事,係唔係專科醫生操刀都係講彩數。

講番呢次做白內障,整完唔駛帶眼鏡,第二日睇嘢已經好清楚,清楚到呢,揸車嘅時候,比較遠嘅其他車嘅車牌都睇到,非常開心。近又睇到,遠又睇到,諗番如果以前讀書嘅時候係咁樣,應該睇黑板舒服好多。遠近都睇到,應該同安裝嘅晶片有關。第一次做嘅時候,冇問我要乜晶片,自己又唔識問,應該係裝咗政府免費提供嗰隻。第二次,專科醫生提供咗三個選擇問要邊一隻,㨂咗比較貴嗰隻,貴嗰隻有多焦點功能,所以依家近又睇到遠又睇到。似乎第二次嗰位專科醫生比較好人比較專業。

戴咗幾十年眼鏡,依家唔駛戴,初初有啲唔慣,後嚟又覺得幾爽。都聽過有人幾十年唔駛戴眼鏡,做完白內障要戴眼鏡。不過依家睇嘢幾清楚都好,專科醫生有提到可能一兩年後要做少少激光修補一下。

多倫多垃圾清除服務

以前喺香港,住嘅地方唔大,好少買唔等洗嘅嘢,買親都係實用嘢。嚟咗加拿大唔同晒喇,住屋仔有個地牢,地牢可以擺好多嘢。加上,美加住嘅地方比較大,傢具亦相對大件,住咗幾十年後,發現好多嘢可以丢,有兩套舊梳化想丢,好多唔等洗嘅舊嘢想丢,又有好多以前以為將來有用但後來發現唔會用得着嘅嘢。上年某日,打算大掃除,實在太多嘢丢,要揾人幫幫手。

喺中文報紙見到有廣告話幫人丢垃圾,有兩套大梳化,唔知自己友華人夠唔夠力,壓親就唔好啦。揾人丢嘢,會諗到幾樣嘢,會唔會有各種各樣嘅附加費,丢電視要加錢,丢電腦要加錢,丢大件嘅嘢要加錢,加幾多又會唔會隨佢噏,突然整親要俾醫藥費,又會唔會丢啲唔丢啲,抬唔起嘅又走咗去。如果係計體積嘅,會唔會求求其其堆堆砌砌,未夠一車又話滿晒。不竟,好少一次過丢咁多嘢,疑問自然多。

走去睇咗好多網評,膽粗粗揾咗間西人丢垃圾嘅公司,網評算可以。根據佢地間公司嘅網頁資料,各樣附加費寫得清清楚楚,算係明碼實價。

到咗預約嗰日,兩位丢垃圾嘅員工非常凖時,上上落落不停搬運,搬咗個幾两個鐘,好似砌積木咁密密麻麻砌滿一架車,態度非常友善兼有禮貌,以為要俾附加費嘅又冇收,淨係俾基本收費。咁樣嘅服務態度真係難得,人心肉做,小费嘅嘢係應該俾啲嘅。今年到依家又執咗唔少嘢,今次可能只需要半車容量,當然又會揾呢間公司。

佐敦華豐大廈

有段時間住過華豐大廈,除咗樓齡比較舊都算幾好住,當年附近都幾多嘢食,最鍾意食馬路對面馬華餐廳嘅海南雞飯,叫外賣嘅次數非常頻密,當時送外賣係要收碗收碟,食完放碗碟出門口,送開外賣嘅阿叔會再返嚟收,有次屋企人撞到送外賣嗰位阿叔,佢同屋企人講話外賣唔好食咁多,話冇益咁話,都好少見到有伙記咁樣倒老板米,可能阿叔見到啲唔應該見到嘅例如唔衛生嘅嘢,於是見到熟客想提點一下。馬華餐廳隔離仲有間檳城餐廳,不過比較少幫襯。

行過兩條街有條街叫西貢街,有間好運餐廳,賣港式西餐非常平民化,抵食夾大件。再行過兩間鋪頭有間叫醉瓊樓,醉瓊樓出名食客家菜,每次去到都係叫嗰幾樣,八珍扒鴨,炒三鮮,鹽焗鷄,咕嚕肉,小雜煲。炒三鮮裡面有樣食材係骨髓,幾特别。西貢街仲有間彌敦粥麵店,想食雲吞麵就去嗰度。華豐大廈對面裕華後面有間燒臘店叫蘇記,唔算好食但又唔難食,特别嘅係斬燒臘嗰位師傅非常老友好識招呼顧客。蘇記附近有個公廁,公廁對面有個大排檔,大排檔嘅及第粥好好食,依家周圍食粥都搵唔番嗰個味道。咁飲茶去邊呢?去金漢酒樓,酒樓有幾層,後嚟97返香港發現原来每一層都變咗做夜總會,唔知幾時開始已經冇茶飲。以前金漢附近有間平價市場喺地庫,都幾好行。金漢附近仲有間餅店都唔錯,不過行遠少少去尖沙咀嘅車厘哥夫仲好食,嗰蘋果批好食到呢,以後搵唔番。

講番華豐大廈,華豐大廈間隔幾特别,有三條後樓梯,中間有天井。十一樓近電梯有間士多,有冇人幫襯呢?有呀,去買汽水維他奶嘅多。十二樓又係近電梯有間小食店,賣三文治西多士午餐肉即食麵等,都幾多人幫襯。唔記得三樓定四樓,有個單位有時攪晚宴,當然規模比較少就係擺幾圍,有次跟鄰居去食蛇宴,味道都唔錯,有冇牌就唔知喇。以後陸續住過其他地區其他大厦,冇再見到大厦内有土多有小食店嘅隔局。仲有一件事想提,以前搭𨋢久唔久會撞到電影演員蕭錦,真係好高大,佢住喺華豐定喺探朋友,就不得而知喇。

安裝 Google Nest Cam with Floodlight

上年黑色星期五見到 Home Depot 大減價促銷 Google Nest Cam ,每個減咗一百四十蚊,真係好抵買,後嚟發現其他鋪頭例如 Best Buy 都係減咁多。Best Buy 仲話唔喺佢度買,都可以揾佢安排安裝,咁又幾好喎。原來所謂嘅安排安裝,係你打電話去查詢嘅時候,將你直接 forward 去其他外判公司做安裝,外判公司留下資料但冇回覆,唔知道係做定唔做,如是者嘗試咗兩次,等咗好多日,都係冇回覆,算把啦,去搵其他人裝。啲人成日話經濟唔好,究竟有幾多老細或者管理層會知道自己員工偷懶有生意都唔做,Best Buy 更加唔會知道原来佢嘅外判公司咁好服務。

相熟嘅電工師傅冇裝過呢種鏡頭,嚟之前上 YouTube 揾過資料,總算安裝妥當,裝係裝好喇,咁點樣接駁呢?網上好多網友話接駁連線唔到,多番嘗試後發現,首先你要靠近鏡頭,等手機偵測到鏡頭,軟件會自然下載到鏡頭,如果你企嘅位置距離鏡頭好遠,軟件係裝唔到嘅。如果唔掂,嘗試又開又刪 flight mode,又刪又開 Bluetooth,然後再嘗試接駁。原本以為要用 Wi-Fi extender,後來發現唔需要。

有網友嫌 Google Nest Cam 唔會響警號,如果你要有隻貓行過都會響警鐘嗰隻,你要另一個牌子。用咗幾個月 Google Nest Cam,仲未壊,有人行過會自動錄影,可以用電腦或手機睇紀錄或者下載影片。

裝咗鏡頭後會發現一啲平時唔會知嘅嘢,例如原来毎日派西報嘅朋友,每次派完報紙都會走去後巷,入去前揪下褲頭,出嚟又揪下,應該想像到佢去後巷做乜嘢,日日如是,有啲過份。打去報紙服務部取消訂閱印刷版,改訂網上版。又發現,依家鄰居比較客氣,知道有24小時自動錄影,以前倒垃圾前嘅夜晚,總被鄰居塞爆垃圾桶嘅情况已經冇再發生。

古惑裝修佬的後續故事

話說古惑裝修佬想呃人,話我家屋頂有窿,後嚟揾人睇過冇窿冇事,原本以為事件告一段落。原來仲有後續故事,有一日全家外出到附近超市買條蔥,十分鐘唔到已經買完返屋企,發現門口鑰匙窿似乎内有異物,似乎被人灌入某種黏土,短時間內會凝固嗰種,即刻搵枝WD40幫幫手,好彩黏土未有時間凝固,鑰匙運作如常。

當時正值更換防風門,拆咗舊門等緊新門嗰幾日,所以大門無遮無掩,任何陌生人都可以企喺門口敲門或者塞你鑰匙窿。究竟邊嗰咁衰塞我鑰匙窿,只見隔離屋嗰個古惑裝修佬停咗架車喺隔離屋車路眈天望地,我哋十分鐘唔到就返咗屋企,裝修佬極有可疑,不過自己又冇裝閉路電視,冇證冇據唔話得人。可能裝修佬想揾生意,佢嘅如意算盤係,如果我哋遲個鐘先返屋企,門窿已經被凝固,順理成章可能近近哋揾佢幫手,點知道我哋只係出去咁短時間。當時佢可能極度尷尬,你眼望我眼,佢心諗你冇證冇據唔話得佢。

當時正好聖誕節黑色星期五,於是趁大減價買了幾部 Google Nest Cam with Floodlight,屋外前後都裝妥咗,電腦又睇到手機又睇到,非常開心兼安心。最近,又見到古惑裝修佬喺隔離屋出入,呢種裝修師傅真係人見人怕,見到都要掉頭避開。

韓國醬油蟹

尋日見到有位網友喺youtube上推介某韓食餐館嘅醬油蟹,如果我認識呢位網友我一定會叫佢唔好食,事關有位兄弟個多星期前喺同一間舖頭都買過醬油蟹嚟食,結果幾日間痾咗好多好多次。相信大家都試過食錯嘢肚痾,少則幾次,最多十次八次,通常幾日就會自己好返。兄弟話今次非常嚴重,食完幾個鐘頭後都冇事,大概十八個鐘頭後開始上廁所。

以前喺H Mart見過有韓式醬油蟹賣,兄弟試過買嚟食,價錢唔算平又唔算貴,好遠水路喺韓國運嚟,味道冇驚喜,兄弟話唔食唔係損失,食後冇不適。點解今次呢間舖頭製作嘅會出事呢?係唔係貨源或處理嘅技術有問題?今次製作醬油蟹用嘅係超市經常買到嘅藍蟹仔,雖然冇乜肉,但都好多人鐘意食藍蟹仔,超市藍蟹仔做大特賣時,好多人圍住搶,走近少少都覺得腥氣迫人,可以想像嗰種蟹仔如果處理不當再生食落肚都可以幾大鑊。

其實食醃製生蟹最怕嘅係染到肺吸蟲,食物安全中心網頁有资料提到:

“生蟹可能帶有細菌(例如霍亂弧菌及副溶血性弧菌)和寄生蟲(例如衞氏並殖吸蟲,又稱肺吸蟲)等不同的病原體。以酒、醋、豉油、蒜頭、辣椒等醃製生蟹都不能消滅這些微生物。只有徹底烹煮食物,才可避免這些病原體引致的疾病。

市民若進食了受污染的醃製生蟹,因應病原體的種類,有機會患不同的疾病和出現不同的病徵。例如霍亂弧菌可引致霍亂,從而引起嚴重腹瀉及嘔吐等症狀,並可導致脫水。若未能及時治療,霍亂可能會致命。另一方面,肺吸蟲可在體內遷移一段時間,常最終到達肺部並引致肺部疾病。肺吸蟲一旦入侵我們的腦部,可引起腦膜炎症狀。感染肺吸蟲後,症狀一般會在數周出現,其病情可持續多年。其他的病原體如副溶血性弧菌等,可引致食物中毒,症狀包括腹瀉、腹痛和發燒。

為安全起見,市民應避免食用醃製的生蟹。”

https://www.cfs.gov.hk/tc_chi/whatsnew/whatsnew_fst/whatsnew_fst_Marinated_Raw_Crabs_and_Food_Safety.html

呢間舖頭仲有一樣嘢要留意,就係土豆豬骨湯。如果你試過其他舖頭嘅土豆豬骨湯,你會發覺呢一間嘅骨頭特別夠火候,用筷子好容易分開骨頭攞肉食。肉湯煲得耐,嘌呤特別高。有位兄弟有個時期非常喜歡呢間舖頭嘅土豆豬骨湯,貪佢夠腍又多肉確實又幾好味,一個星期買兩次,每次吃不完又第二晚加熱繼續,如是者食咗幾個星期,痛風發作,呵呵,而家唔敢食喇。

多倫多門窗更換

打開報紙睇見唔少門窗廣告,有好多熟口熟面,例如常見的有東俊門窗、宏豐門窗、佳捷門窗、加拿大門窗、皇冠門窗等等,間間都話自己頂呱呱,花多眼亂,都唔知揀邊間好。

走訪多個華人論壇評介網站,再問埋親朋戚友左鄰右里,多少對更換門窗多了一點點理解。規模最細嘅係幾丁友走嚟同你換,換嘅唔係大廠出品,又有可能換換下走咗去幾日後再返嚟。最後搵咗幾間有點規模嘅,走去睇睇陳列室,再搵師傅嚟估價。

印象最深刻嘅一位師傅,一開始介紹產品時就不停數臭其他門窗公司嘅產品,講到興高采烈眉飛色舞,我想話師傅我同你唔係咁熟,你介紹自己產品得架喇,唔駛不停抵毀其他公司,人哋知道可能會告你毀謗㗎。呢位師傅仲有樣搞鬼玩嘢,佢嚟估價時話有幾個窗口係冇風嘅,唔需要裝窗裝塊玻璃就可以喇。嘩!咁都得!事實係換完新窗後,個個窗都好好風。

有啲師傅話自設廠房,全部華人打理,其實廠房嘅嘢可大可小,得兩條友喺度揼下揼下,都可以叫做廠房。建議先上 youtube 揾啲有名嘅門窗製造公司睇睇,例如 Gentek、Window City 等等,例如呢個視頻 Window City Manufacturing in Ontario – https://www.youtube.com/watch?v=pHYQ6qlqTmQ。似乎大廠出品比較有保證,與其揾間自設廠房嘅,不如揾間有熟練安裝團隊嘅幫你安裝大廠出品。

記得有位師傅話佢地啲窗門好穩陣,點穩陣法?師傅話佢地塞好多材料入窗框裡面,聽落都唔知信唔信得過。又有位師傅,電郵問佢地窗門係用乜牌子,嗰位師傅完全唔答,兼且從此消失,難道窗門係用 no name 嘅? no name 嘅信唔信得過呢。有位老友提到某間門窗公司,安裝完出了點點問題,嗰位 sales 從此消失唔再見人,聽落唔係好穩陣。講起陳列室,有一間特別陰森恐怖,參觀完畢出咗陳列室門口後,家人不約而同互相詢問頭先入面見到幾多個人,大家答的數目並不一致,都係早走早着。

好啦,大家可能會問究竟揀咗邊一間,並唔係以上提到嘅任何一間。揀咗間老字號,價錢唔太平又唔太貴,有點折扣。估價上門,量度尺寸,安裝工程都非常準時。團隊六個人,非常勤力冇吞卜蛇王,七個小時內完成兩層樓嘅窗門更換,安裝完有清理收拾,整體滿意。

多倫多屋頂維修

某日出外鏟草,隔籬間屋有位師傅在屋頂進行修理,距離有點遠修理什麼看不清楚,師傅非常友善地打招呼,人家這麼友善,當然應該揮手回應。未幾,屋企有人外出歸來,話隔籬屋師傅話我家屋頂有個窿,師傅仲好好心咁問可有需要過嚟睇睇。

窿嘅嘢,可大可小,落雨漏水唔好,有小動物入侵又係唔好,自己又唔夠膽爬上去睇。好多人可能覺得既然有屋頂師傅喺附近,應該麻煩師傅睇睇,不過突然想起有認識相熟嘅屋頂師傅,於是婉拒隔籬屋師傅嘅好意。

第二日,自己認識嘅屋頂師傅嚟檢查,檢查一番沒有發現。師傅提醒話唔好隨意找人上屋頂檢查,有些不良缺德嘅師傅會上你屋頂鑿個窿,再映張相你睇,咁有窿你整唔整吖?呵呵,好彩冇請隔籬屋師傅上屋頂,當然又有可能係隔籬屋師傅睇錯咗。

又過咗幾日,隔籬屋屋主閒談間話非常唔好彩,師傅維修中有水管突然爆裂,究竟係水管舊自己爆,還是俾人鑿爆,真的不得而知,只知道嗰間屋整咗好多個月,整完一樣又一樣,沒完沒了。

今早食粥還是食點心呢?

某標榜自己全日二十四小時開門賣點心的中餐館最近被衛生檢查員發現多處違規行為,其中一樣非常嚴重,一樣嚴重,六處輕微。關鍵的違規行為涉及未能“保護食品免受污染或摻假”,而重大的違規行為涉及未能“維護洗手台(液體肥皂和紙巾)”。六項輕微違規大多與食物處理間的狀況有關,即“食物處理間的食物處所沒有保持乾淨的地板和牆壁”和“設備沒有保持衛生”等等。儘管這家餐館收到了八處違規行為,但餐館可以繼續營業,相信餐館工作人員會陸陸績績處理有關違規事項。

以前有段時間日日都去幫襯這間餐館,味道一般不過價錢真的實惠,當中顧客除了華人,還有不少南亞街坊光顧。當時最欣賞這間餐館的地方是食物供應充足,例如盅頭飯,供應非常充足,如果你想食飯,一定有機會攞到一兩盅,點心阿姐走完全場兩次,總有七八盅剩下來。有很多老人家多點一盅飯帶走就可以回家當晚飯了,老板的食物供應安排真的難得,很多茶樓老板都會希望茶客多叫點心少吃飯吧,不過已經有好幾年沒有再去,所以不知道現況如何。

為什麼每日都幫襯的餐館後來沒有再去呢?因為後來有段時間比較喜歡食粥,而且就算想吃點心也可以在某華人超市買點心,又方便又衛生又不用等。在喜歡食粥的日子,拜訪了每間在家附近經營的粥舖,由於外帶回家吃所以太遠的粥舖就沒有去了。

記得有一間粥舖(已經結業)除了賣粥還有賣豆漿,第一次買的豆漿是新鮮滾熱的,第二次買的是室溫的,第三次買的是冷凍櫃拿出來的,第四次買的也是冷凍櫃拿出來,不過後來發現樽底有很多沉澱物,應該是不太新鮮,老板這樣關照,沒有再幫襯第五次了。其實還有其他事項充以令人卻步,例如有一次有咁啱得咁蹺見到粥舖老板娘在粥舖隔離間超市購物,本來購物當然是平常事,不過老板娘穿着粥舖制服,選購的是差不多壞掉最便宜的瓜果蔬菜,令人不禁推想那些食材究竟是買來自己吃的還是鋪頭用的呢?有時覺得如果有咁啱得咁蹺上天安排令你見到的東西,一定是別有玄機。

好了,吹水吹到這裡,打算去超市買點心吃了,這間超市的點心真的不錯,品種比酒樓賣的還要多,有點心又有和菜套餐炒粉麵飯一應俱全。

家居維修經驗談

話咁快又十二月喇,到目前為止都唔係落咗好多雪。記得初初移民時,一見到落雪就非常開心,落少少都馬上出去鏟,而家知道喇,落少少係唔使鏟嘅,尤其係零上幾度或有陽光嘅話大多數都會自己溶掉。話說今年洗咗唔少錢喺家居維修度,咁啱得咁橋好多嘢一齊要修理,好似夾埋今年一齊壞咁嘅款。

首先係後院嘅木圍欄,仲記唔記得大半年前打個幾次大風,大自然嘅威力確實不同凡響,大風將差不多一半嘅圍欄打鬆咗,差唔多手一推就會冧落嚟,嘩!幾得人驚呀,唔覺意責親人就唔好啦。以前有位師傅幫手整過嘅,打算再揾佢幫手,點知聯絡一次後電話留言一概唔覆,又冇話做又冇話唔做,過咗幾日覺得唔對路,於是上網尋人,原來嗰位師傅宜家係做室內設計係食大茶飯嘅,圍欄維修嘅可能唔做啦。揸車到附近左右睇睇有冇師傅整緊圍欄,揾唔到,係咪家家户户個個後園嘅圍欄都無穿無爛呢,非也,只不過可能係經濟問題,好多伙人都係用木條或木板等頂住,頂得一日得一日。於是惟有睇睇報紙嘅分類廣告,膽粗粗揾咗位師傅嚟睇睇,嚟嘅師傅係鄉里,收费尚算老實合理,手工也算穩陣妥當,附近嘅鄰居亦走嚟問價,兩位師傅非常開心,做完一單又一單。

接住落嚟壞嘅係車房門,點樣壞法呢,就係唔識閂門,車房門落下之後又自己捲上,好彩有相熟嘅師傅。以前師傅整過,話係離地幾寸嗰兩個感應器嘅問題,今次問題較大連系統都要整個換掉。師傅話可以自己上網先買貨佢哋遲啲嚟安裝,上網見到有啲幾百蚊有交易,太平唔知信唔信得過,都係拜託師傅買貨。呢兩位車房門師傅真係非常老實,最後收費係比報價少咗好多,今時今日會為顧客慳錢嘅師傅唔多,不過有機緣嘅話總會遇到幾位。

車房門之後係某個座廁水箱壞咗,唔只漏水仲會傾則下沉,嘩!好得人驚。初初有位相熟嘅師傅嚟睇過,吩咐我哋買好材料話佢會嚟安裝,點知嚟到話唔識裝,話要揾多個前輩師傅嚟幫手,問師傅大概要幾多錢,師傅話工程複雜到報唔到價。上網見到普通座廁安裝一般收幾百,換埋地磚千五左右,當然工程嘅嘢可大可小,報唔到價嘅工程應該唔細啩,師傅仲話家有長者應該拆牆安裝安全扶手咁話,呵呵,咁睇工程似乎又幾複雜。如是者等咗幾個星期,可能相熟師傅同埋前輩師傅講唔掂數,最後相熟師傅回覆話無能為力。睇住幾盒American Standard座廁,揾邊個嚟裝呢?最後有位好鄰居介紹咗個師傅嚟,隔兩日週末就嚟幫手,一日内換咗三個座廁兩個洗手盆,百幾蚊換一個,每個加十蚊幫你丢埋,呢位師傅真係聖人。原本呢舊座廁係可以放喺前院等政府部門嚟收,不過好多時見到左右隔離嗰啲丢出嚟嘅幾個禮拜都無人收,舊座廁嘅嘢就無謂攞出嚟獻世喇。

換完座廁後跟住落嚟嘅係暖爐,有相熟嘅師傅嚟做每年檢測,話暖爐漏小量一氧化碳,嘩!呢個又係好得人驚。記得某一年係同時換暖爐同冷氣機,既然宜家要換暖爐咁就同時換埋冷氣機,過程顺利安裝妥當。最近覺得熱水爐唔係好熱,正準備揾煤氣公司,閒談間問起師傅有冇做熱水爐安裝,師傅話可以,仲問起上一次幾時换。記得係廿年前某次duct cleaning某公司吹熄咗爐火,某公司話唔關佢事,打去煤氣公司求助,煤氣公司揾外判公司嚟檢查,印度師傅好熱心咁連爐都換埋,自此以後每月收租費,廿年嚟從來冇再嚟檢查,熱水爐亦從來冇壞,係最近覺得熱水唔係好熱。師傅話熱水爐要做檢測,自己買嘅比租用抵,唔做清潔有機會會爆炸。自已上網查資料,有數據話用咗十年嘅有四成機會會爆炸,可能有啲誇張,以前唔知就話啫,宜家知道就會定期做檢查。真奇怪,師傅年年都嚟檢查暖爐同冷氣機,就係冇提到熱水爐。嗰日師傅換完爐要趕住走,話說某戶人壞咗熱水爐,煤氣公司嘅外判公司嚟話換新爐要簽廿年約,個户人唔肯簽,外判公司拆咗舊爐就走咗,師傅要趕去幫手裝新爐,天寒地凍突然無熱水用又係幾無癮嘅。

以上就係今年嘅家居維修事項,明年又唔知道要換啲乜嘢喇。

豬潤如何處理?點樣整先好食?

豬潤係一樣久唔久會想食但又唔能夠食得多嘅東西,食得多會滯,食得少又唔夠過癮,份量嘅嘢又同切得幾厚幾薄好有關係,切得厚嘅食幾件就夠喇,切得薄嘅可以食多幾片。究竟應該切得厚還是切得薄,似乎純屬個人喜好,可以想像嘅係切得厚嘅,口感比較好但容易煮唔熟所以比較考技術,切得薄嘅容易熟係比較安全啲嘅。不過無論係厚定係薄,煮之前仲係要處理妥當,否則食嘅時候會有血腥味,食一件都嫌多。

有好多教人整豬潤嘅話要醃半個鐘先好煮,有啲仲話醃十五分鐘就得喇,根據多次嘗試,發現半個鐘係唔夠嘅。如果你整過幾次都係覺得腥嘅,不妨試試以下方法。

薑蔥爆豬潤

材料:豬潤磅幾、薑幾片、蒜頭乾蔥各幾粒,拍鬆青蔥幾條,梳打粉一兩茶匙

醃料:生抽一茶匙、薑汁酒一茶匙、生粉一茶匙、鹽糖適量、麻油胡椒粉各少許

調味:上湯幾湯匙、鹽糖適量、蠔油幾茶匙、生粉半茶匙、麻油胡椒粉各少許

做法:豬潤洗浄,切件加入梳打粉,清水幾湯匙撈勻,醃兩個鐘頭,放喺水喉下沖水十零分鐘,除去梳打粉味取出,滴乾水份,加入醃料醃半個鐘,燒熱滾水放入豬潤拖水取出,燒熱幾湯匙油,爆香薑片蒜頭乾蔥,放入豬潤兜幾兜,灒酒加入調味料,兜多幾下,放入蔥段兜匀,即可上碟。豬潤兜太耐會嚡口,兜幾耐視乎豬潤厚薄大細爐火大細,做多幾次就會恰到好處喇。