Author Archives: oldman

第三針胳肋底痛

某日偶然間查看搜索記錄,發現有很多訪客搜索關鍵詞“第三針胳肋底痛”,似乎有不少人打完第三針有副作用胳肋底會痛,於是好奇地周圍去問一問認識的兄弟們打完第三針有没有其他較為顯著的副作用,有兄弟報告無論是輝瑞還是莫德纳,打針的部位第三劑似乎比第一二劑痛,又皮膚上有少少發癢紅疹,大概一星期後症狀消失。

我記得我的第三劑是年頭打的,當時政府突然宣佈所有成年市民都可以預約接種第三劑,因為太多人同時想登記於是預約總是爆滿,網上預約非常困難。有部份市民等不及預約的會去臨時街站排隊接種疫苗,成功打完第三劑的原先的網上預約會自動被取消,呵呵,只要有耐性的每日碰碰運氣上上網總會有機會找到個預約檔期。

某日我也幸運地找到個較近的檔期,是去某華人機構耆暉會打的,過程非常流暢,首先停車場夠大泊車很方便,期間只需要出示健康卡一次,記得上次去Malvern要出示健康卡五次!今次過程非常簡單,一入去坐低登記,護士阿姐推架車仔過來打針,打完後坐在原位等一陣無事就走得,唯一美中不足的是現場沒有收據提供,據說接種疫苗的收據是會用電郵方式寄來。

幾時打第四針呢?在前線工作的兄弟們說大概是在四月吧,政府的網站有寫,現在有資格接受第四劑疫苗的是居住在長期護理院的長者,在第三劑後三個月可以接受第四劑。

在安省換駕駛執照健康卡

早排打算換駕駛執照同埋健康卡,上網見到政府網站寫住“You may be able to renew both your driver’s licence and Ontario photo health card if they expire at the same time.”鬼咁開心,以為可以上網攪掂兩張卡,奈何試咗幾次系統總係話駕駛執照可以網上續領更新但係健康卡唔得,無理由咁老土一張網上更新一張親身走去Service Ontario櫃位辦理,冇辦法喇惟有局住親自去Service Ontario辦理。

由於疫情關係,政府寬限咗駕駛執照同埋健康卡續領嘅最後期限,駕駛執照係三月頭,健康卡係九月尾,會唔會係兩張卡嘅最後期限都唔同所以唔可以同時辦理呢?但好多時候駕駛執照健康卡嘅過期日都係以生日嘅日子計數,需要同時辦理兩張卡嘅應該有唔少人,冇辦法喇去排隊更新啦。

以前去開個間Service Ontario不嬲多人,無論乜嘢時間除咗門口外有條人龍入面一定有個蛇餅,等個零鐘係閒事。今次門口也沒有例外,未入停車場泊位已經見到門口有條人龍,幸好人龍唔長可能係臨近收工時間去到,心諗只要五點前逼到入去打蛇餅就冇問題啦。今次入口處多咗盞燈,有告示話要等見到綠燈先好入去,換言之如果唔理燈號擅自入去可能會俾人鬧,嘩好認真喎。由於人龍唔長,有可能係職員辦事能力高手腳超快,當然又有可能係就快五點喇,只係等咗幾分鐘就可以入去。

嘩,不得了,原來入面係冇蛇餅!見唔到蛇餅有啲唔習慣,一入去就可以走去櫃位辦理手續,前後十分鐘唔到手續就做好,映埋相收埋臨時文件,櫃位職員話可以走喇返屋企等信,可能疫情期間都唔想對得你太耐,做完就好走喇問題唔好多問,咁有效律嘅流程真係值得一讚。稍有不便嘅係大家都帶了口罩,中間再隔了一塊塑膠板,左右又有人在辦理手績,似乎冇兩米距離,交談有啲唔方便,不過整體運作算唔錯喇。可能臨近收工時間去攪手績係個唔錯嘅安排,不過又有可能一到五點就即刻鎖門冇人情講,仲係到排緊隊嘅明天請早!

有關老人家入住老人院

最近某報章有篇文章是關於老人家入住老人院的討論,標題是“把父母送進安老院不是冷血!老人家反而會長壽。”這是個頗有爭議性的話題,其實老人家們大多是被動的一群,人老了或多或少會有時候需要別人照顧,有兒有女的老人家通常都是由兒女照顧,兒女們又可以分為四類人:有心有力,有心無力,無心有力,無心無力。

無心照顧的就不好說了,有時一家不知一家事,家家有本難唸的經,局外人是很難明白的。最難得的是有心有力照顧老人家的兒女們,附近有一户鄰居剛好是一個很好的例子,那户人家老人家年紀大了患了失智症,退休的兒女們都聚在一起輪流照顧老人家,還聘請了幾位看護二十四小時幫忙照顧,又購置了改装好的汽車方便老人家輪椅出入,那户人家的老人家真的幸福。然而又有很多兒女們是希望照顧老人家的但奈可自己又力有不逮,例如老人家行動不便生活上不多不少需要一些搬搬抬抬的配合,如果兒女們自己都有點年紀,相信對需要搬抬的工序會有點難度,那時候惟有無奈地將老人家送入安老院。

那麼把老人家送進老人院會令老人家更長壽嗎?當然普遍子女們都希望父母健健康康長命百歲壽命越長越好,但根據安省最近的數據,養老院的住客們平均在十八個月内離開,平均住多十八個月算不算是長壽呢?以前認識的一位老人家親戚,入住後幾個月就走了。探望老人家親戚的時候發覺老人家總是被綁在輪椅上,原因可能是老人院人手不夠不可能長期跟在每位老人家身邊,綁在輪椅上就最安全了,相對地老人家也逐漸失去了活動能力。記得這位老人家在未入院前,在家中還可以自由活動,雖然是走得慢一點,不過還算是行得走得。為什麼要將行得走得精神狀態良好的老人家送入老人院呢?這方面有時外人不能理解,只能感到無奈。當然世事有幸有不幸,以前也曾經聽聞有認識的老人家入住後住得安穩妥當,到現在還是健健康康,相信這個跟老人家入住老人院的身心狀況有密切關係。

對於那些無奈地將老人家送入安老院的子女們,可能會認為將老人家交給專業人員照顧是最好的選擇,有時這個不能一概而論。疫情間大家都聽聞到有部份私營牟利的長期護理院管理得非常差,有錢派息給股東但又不花錢將服務升級前線人手工資低微等等。其實某些非牟利的老人院也有類似的工資問題,你可能會留意到某些有點名氣的非牟利護理院,打入陽光榜的高級管理人員可能有廿幾人,但是前線員工的工資還是不甚理想甚至可說是刻薄。非牟利機構有很多時候會舉辦籌款活動,但對於有很多員工打入陽光榜的護理院,一位打入陽光榜的員工已經代表年薪十萬以上,陽光榜年薪十幾二十萬是很平常的,如果你打算捐款的話,一千幾百幫得有幾多呢?有幾多可以真正進入前線員工的口袋呢?

對於提供老人護理服務的行業,那是一份很容易積福又是很容易折福的行業,可幸從事老人院的大部份前線人員都是有愛心有耐心的有心人士。如果家中有老人家需要入住老人院,申請前請多做資料採集,政府有網頁可以搜查每間護理院的狀況,投訴多不多,犯規多不多等等。

https://www.health.gov.on.ca/en/public/programs/ltc/home-finder.aspx

https://yourhealthsystem.cihi.ca/hsp/indepth?lang=en#/

AH10292: Invalid proxy UDS filename

今早真係唔得了,幫老友裝嘅VPS所有網頁全部瓜直,當然自己嘅網頁都瓜哂,初時以為有黑客入侵,不過又冇理由咁多個VPS唔同地點嘅都同時間出問題,後來喺控制面板Plesk嘅支援網頁找到答案,原來昨晚系统自我更新時網絡服務器嘅軟件出錯,所以全部網頁都彈出個500 error,真係嚇死人!

初時支援網頁教人用SSH入去改動一下,根據留言,有人話work有人話唔work,嘩,掂唔掂架,後來又有高手教人喺PHP Settings裡頭嘅PHP support選擇FastCGI application served by Apache,掂喎,又簡單又快捷,全部網頁馬上復活。

大概過咗幾個鐘頭,Plesk有更新喇,更新後可以用番FPM application serverd by nginx嘅選項,全部正常,好似冇事發生過咁。不過,聽講用Ubuntu 18.04.6嘅朋友仲係有問題,好彩我喺年頭升級時揀咗Ubuntu 20.04,講起其實上年已經想用Ubuntu 20.04,不過當時用開嘅Immunify360唔支援Ubuntu 20.04,所以等咗幾個月先升級,升級後系统確係快咗毛病少咗。

今次問題的解決方案及最新進展可以喺以下連結找到: Website on Plesk server suddenly started to show 500 error: AH10292: Invalid proxy UDS filename
https://support.plesk.com/hc/en-us/articles/4407366133906-Website-suddenly-started-to-show-500-error-AH10292-Invalid-proxy-UDS-filename

減肥必讀

最近睇完一本講減肥嘅書,未睇之前聽講好多書評都話呢本書幾有用,好多話睇完之後真係減到肥,有啲人仲話如果只可以揀一本講減肥嘅書,睇呢本就夠喇。自己睇完後都覺得真係唔錯,值得推薦。呢本書叫The Obesity Code,作者係Jason Fung醫生。

有時有啲書可能要由頭到尾睇幾次先記得內容,但呢本書簡單易讀,某些内容有少少重複,所以由頭到尾睇完一次之後,已經大致記得重點。最重點嘅幾句喺第233頁:Reduce your consumption of added sugars and refined grains。Moderate your protein intake。Increase your consumption of natural fats and fiber and vinegar。

以上幾句看似簡單,甚至會有人話係老生常談,問題係好多大道理都係看似簡單其實並不簡單。點解節食唔能夠減肥?點解做運動幫助唔大?點解減完一陣磅數又反彈?點解早餐可能唔係最重要嘅一餐?點解一年重過一年?點解試過好多方法都冇效?點解單靠計算卡路里出入係冇用嘅?點解食脂肪肥肉係好事?俾啲耐性由頭到尾睇完呢本書,就會找到以上問題嘅答案。

作者仲有其他著作,例如The Diabetes Code,The Cancer Code等等,有機會睇完再跟大家分享。

氡氣檢測

久唔久報紙電視各種媒體都會報導一下提到氡氣有幾危險,聽得多睇得多自然上心,某日终於下定决心打算替房子做點氡氣檢測。

氡氣是一種放射性氣體,無法看到、聞到或嚐到,係僅次於吸煙的第二大肺癌病因。根據政府網站資料,氡氣水平最好唔高過200Bq/m³,某份好多年前嘅調查報告提到大約7%嘅加拿大人家庭的氡氣水平高於當前200Bq/m³嘅準則。咁如果高過又點呢,聽講花一二千元裝個抽氣扇還是什麼東西,可以大大改善氡氣含量甚至減少80%咁話。詳細内容可以睇一睇呢個網頁https://www.canada.ca/en/health-canada/services/publications/health-risks-safety/guide-radon-measurements-residential-dwellings.html。

政府網站有介绍多家提供氡氣檢測嘅公司,多數都係寄一件儀器過嚟量度三個月後再寄返俾實驗室等報告,有一啲實驗室係美國,嘩遠唔遠啲呀,點解安省冇㗎,費用六七十蚊。喺搜索嘅過程中發現有另一個方法,原來除咗嗰種較傳統嘅测量方法外,重有一種數碼化嘅手提探測器。呢種數碼化氡氣探測器有好多隻牌子,經過多番比較下,發現有隻叫Airthings嘅似乎幾好,負評不多,Best Buy有得賣,好多地方都有得賣,Amazon甚至有貨一日内就送貨。有得揀嘅話,咁你想等幾個月還是等幾日,我就比較喜歡今日訂貨明日收貨嗰啲。需要一提嘅係Health Canada唔推薦使用數碼化氡氣探測器,咁有時唔推薦嘅嘢有好多原因嘅,普通老百姓唔容易明白。

好,咁講返呢件Corentium Home by Airthings,Radon Gas Detector,Canadian Version,由挪威公司設計開發,在突尼斯組裝,盛惠二百二十九加元,免運費,一日内收到。操作非常簡便,在儀器後背篤一篤reset,要等一日先有數據顯示,冇得心急。顯示器上嗰幾條dash眨下眨下,由幾條到一條到冇就有數據喇。託賴我屋企嘅氡氣水平還算不錯,普遍低過二十。

疫苗對Delta變體的有效率

月頭走去打第2劑疫苗,打完冇覺得有咩唔妥,感覺良好,初時還以為打完疫苗胳肋底會腫,托賴似乎冇事。同樣是走去Malvern Community Centre打,相對上一次,今次明顯地多人,門口甚至有幾個人在排隊可能是walk-in嘅,不太清楚,希望大家都有機會打哂疫苗。

話說某日睇咗個Health Canada嘅短片講關於COVID-19 vaccine以及Delta variant的相關資料,政府成日叫人打疫苗,究竟疫苗幾有效呢,短片提到嘅數據有點意思,所以特意抄低記下。

“Delta變體有什麼不同呢?Delta變體在冠狀病毒的刺突蛋白中具有特定突變,使其能夠更有效地與我們的細胞結合。這意味著更少的病毒可以感染我們,受感染的人可能攜帶更多的病毒。因此,它的傳播效率比以前的變體高約60%。

Delta變體更有可能導致頭痛、喉嚨痛、流鼻涕和發燒,而不太可能導致那些傳統的COVID 症狀,例如咳嗽和嗅覺喪失。但不幸的是,研究還表明,與alpha變體相比,Delta變體會導致更嚴重的疾病,需要住院治療的機率大約是其兩倍。

疫苗對Delta變體非常有效。像輝瑞這樣的mRNA疫苗的兩劑劑量在80%到90%之間。兩劑阿斯利康的有效率約為60%。這兩種疫苗中的任何一種疫苗的有效性只有33%左右。

兩劑輝瑞後住院保護率為96%,兩劑阿斯利康後住院保護率為92%。即使在一劑之後,輝瑞的保護率為94%,阿斯利康的保護率為71%。”

預約第2劑疫苗

上個星期政府宣佈放寬預約接種第2劑疫苗嘅條件,昨日早上八時開始接受網上登記。今日報紙報導原來昨天半日已經預約了多達10萬個登記,話有些市民要到距離住所最近都要100多公里遠的地區才有預約名額,最快亦要到8月份,又話有些市民在預約網頁等候了90分鐘等等,亦有很多人落空登記唔到。

本人昨日也有上網登記,八點一到立刻填表格預約,原來我已經慢了,分零兩分鐘之間我前面已經有六萬多個用户在排隊。系统話要等一個小時左右,似乎又幾準確,八點半嘅時候仲有三萬多人喺我前面,心唸千祈唔好停電或斷線,再排過就極無癮喇。我又唸會唔會接近九點啲人要返工會放棄排隊呢?原來係唔會嘅,可能大家都係在家上班。

話時話终於等到九點鐘到我登記喇,在思想那一個時段比較方便嘅時候,已經有不少時段被登記了,真的是手快有手慢冇,幸好登記咗嗰七月頭嘅。今次嘅經驗告訴我,如果下次有類似的情况,要喺八點前已經填好表格,八點一到馬上按Submit,而唔喺八點先開始填表格。又好彩冇聽系统嘅提議,人太多請下午再嘗試登記。

排隊中留意到這個排隊軟件叫Queue-it,運作算暢順,差不多每分鍾都會更新資訊一次,告訴你還有幾多人在你前面排隊,约莫還要等多久等等。網上又有評論話呢個軟件唔好用,話後嚟嘅人會排在前面,令原先排隊嘅會越排越後,排到一塌糊塗咁話。都唔知係未真嘅,我冇發現呢個情况,我反而頗為滿意呢個軟件嘅運作,想知道佢地點樣收费,不過網頁冇寫價錢。有好多公司都係咁樣嘅,冇明碼實價,可能大有大食,细有细食,唔寫價錢,睇定再食。

士嘉堡中式點心

幾日前西報報道咗一間喺士嘉堡嘅中式點心茶樓,報道內容當然提到疫情之下生意難做,老老實實講句公道話,疫情之下好多行業生意都有影響,不過做飲食業生意唔好有好多因素,同啲嘢好唔好食,烹調製作技術好唔好,食材好唔好,服務好唔好,啲嘢衛唔衛生等等,都好有關係。

記得以前有段日子喺呢間茶樓都幫襯唔少,係算唔錯嘅。後來該茶樓又喺另一個商場經營咗另一間茶樓,價錢比較高檔,質素又似乎相對地較高檔,家人非常喜歡,所以轉移咗陣地。非常可惜嘅係喺疫情之下,不能堂食只有外賣,這間稍為高檔嘅暫停營業,門口寫住想買點心嘅要去先前提到嗰一間。

問題來了,初初還可以嘅,後來出品似乎間歇性有問題。腸粉皮太厚了,蝦餃皮也實在太厚。最離譜嘅係有一次點咗個皮蛋瘦肉粥,粥面竟然有幾mm嘅油,有時食粥係想清吓腸胃,做乜俾幾mm油我呢!自始以後,暫時不敢再幫襯,點心嘅嘢,唔夠技術嘟唔可以夾硬嚟嘅。可能呢,疫情之下嗰班老師傅放咗假,希望疫情過後不久嘅將來一切會回復正常。

有次喺YouTube見到某間喺北美某個州賣中式點心嘅話要進軍内地,已經有分店咁話,話要將喺北美嘅中式點心製作技術帶返內地。有時有啲人莫名的自信真的令人驚訝,只見影片中嘅點心厚粉厚皮,特色似乎係大件,咁大大件厚粉厚皮嘅點心,食咗係應該幾飽嘅。我個人都係喜歡精巧一點嘅點心,一籠皮薄餡靚嘅蝦餃,一碟皮薄餡靚嘅牛腸,那就非常滿足了。你呢,喜歡皮薄嘅蝦餃,定係皮厚嘅蝦餃?

食自熱鍋送一氧化碳

最近睇某齣韓劇,劇中見到有自熱鍋的值入廣告,劇中人物食得津津有味,旁人想分吃一匙也不可以。雖然明知係賣廣告,但也不禁好奇今時今日嘅自熱鍋是什麼味道?有什麼特出的地方?

走去超市買了幾個,食後感覺比較一般,唔能夠話好食,但又唔係太難食。但如果你問我想唔想再食,我會答唔想,一生人中冇食過唔係損失。

如是者過了幾個鐘頭,家中嘅一氧化碳探測器間歇性發出警報,一連四下嗶嗶聲。根據有關指引,四下嗶嗶聲代表探測到一氧化碳。如果係四下嗶嗶聲,停一停,再四下嗶嗶聲,再停一停,如是者不停重複嘅,代表情況嚴重。間中響幾下嘅,不太嚴重,不過照道理也應該查出究竟。係唔係暖氣機有問題呢?還是熱水器出事呢?由於家中嘅一氧化碳探測器也有廿多年歷史,聽講應該五年換一次,用咗廿幾年係有點誇張,會唔會係用得耐儍咗呢?

照計久唔久先響一響,份量應該唔多。突然醒起食自熱鍋時,自熱鍋自己加熱時有類似水蒸氣噴出,會唔會個啲唔係水蒸氣咁簡單?上網用關鍵詞自熱鍋同埋一氧化碳查了一下,原來自熱鍋加熱會出一氧化碳,疑惑解決了,原來用咗廿幾年嘅一氧化碳探測器仍然有效。

去Malvern Community Centre打疫苗

早幾個星期去了Malvern Community Centre打疫苗,之前預約需時大概一個月,揀那個地點的原因是以前有段時間在那個地區走動過,所以對那個地區比較熟悉。登記完才記起那個地區比較品流複雜,會唔會冇得打輝瑞或莫德纳,儘管登記預約的網站是寫明打輝瑞或莫德纳,但如果到時冇貨會唔會局住要打阿斯利康。雖然政府嘅宣傳叫人有得打就打,唔好揀嚟揀去,但有啲人特别唔好彩,彩票又唔見佢地中,唔好彩嘅嘢話中就中,微乎其微的血栓風險還是可免則免。

想上網揾一揾去Malvern Community Centre嘅係打乜嘢疫苗,揾唔到。有人話如果唔想打可以走番出嚟唔打,係唔係咁容易㗎,好似唔係咁好意思噃,會唔會門口有大大個牌寫明打邊隻呢,會唔會揾唔到個牌呢。後來先知道入度去,問打針嗰個會講你聽,咁唔問會唔會唔講你聽呢,這個不清楚,不過臨走都會有收據講你聽打了乜傢伙。

話說當日預約時間前十分鐘到達,沒有人龍,嚟打針嘅人有出有入,非常有規律。總共有五個程序,每個關卡都要睇健康卡。門口有個望一望,入面俾份红色表格你嘅又望一望,正式登記嘅再望一望,打針嗰個又話要望一望,最後印收據嘅要再望多一望,整個程序三十分鐘左右,安排嚴謹妥善又有效率,值得一讚。當日打嘅係輝瑞疫苗,後來發覺那個時期好多親朋戚友都係打輝瑞疫苗。

現在已經過了數星期,似乎沒有感到有副作用,或者有但自己唔知,一切感覺良好。

諗計偷懶

疫情之下很多人都work from home在家工作,有好多老細唔知道係咪自已成日偷懶,所以覺得其他人好似佢一樣咁懶,於是成日吼住員工的在線狀態。

老老實實,正常人都會行開行埋走出走入,冇人會一整天坐在電腦前動也不動,咁行開行埋嘅時候,鼠標會idle,很多通訊軟件會顯示使用者idle了多久,idle得多唔多,idle得耐唔耐,idle得多idle得耐俾老細見到就唔多好,於是有些聰明的員工會諗計仔,怎樣令鼠標唔會idle,好似自己好忙咁不停工作呢?有樣東西叫mouse jiggler。

Mouse jiggler的作用在於模擬鼠標郁動,鼠標郁動就唔會idle,開著後網上的老細或同事見到會話,嘩!呢位同事勤力呀,上班時候一分鐘都冇idle呀,勁揪!

Mouse jiggler在很多網店都有得賣,有平有貴,可以選擇軟件或硬件式。最簡單便宜的是軟件式安裝,但有時有些人用嘅係公司電腦,唔方便甚至唔準自己額外裝軟件,那時候惟有用硬件式的mouse jiggler。

以前見人用過一個自製的老土方法,用一把旋轉風扇,一條膠片一頭黏着風扇,另一頭黏着鼠標,你可以想像到當風扇來回轉動時,另一頭的鼠標也跟著郁動,是有點老土,不過呃到老細就掂啦,呵呵。