話說古惑裝修佬想呃人，話我家屋頂有窿，後嚟揾人睇過冇窿冇事，原本以為事件告一段落。原來仲有後續故事，有一日全家外出到附近超市買條蔥，十分鐘唔到已經買完返屋企，發現門口鑰匙窿似乎内有異物，似乎被人灌入某種黏土，短時間內會凝固嗰種，即刻搵枝WD40幫幫手，好彩黏土未有時間凝固，鑰匙運作如常。

當時正值更換防風門，拆咗舊門等緊新門嗰幾日，所以大門無遮無掩，任何陌生人都可以企喺門口敲門或者塞你鑰匙窿。究竟邊嗰咁衰塞我鑰匙窿，只見隔離屋嗰個古惑裝修佬停咗架車喺隔離屋車路眈天望地，我哋十分鐘唔到就返咗屋企，裝修佬極有可疑，不過自己又冇裝閉路電視，冇證冇據唔話得人。可能裝修佬想揾生意，佢嘅如意算盤係，如果我哋遲個鐘先返屋企，門窿已經被凝固，順理成章可能近近哋揾佢幫手，點知道我哋只係出去咁短時間。當時佢可能極度尷尬，你眼望我眼，佢心諗你冇證冇據唔話得佢。

當時正好聖誕節黑色星期五，於是趁大減價買了幾部 Google Nest Cam with Floodlight，屋外前後都裝妥咗，電腦又睇到手機又睇到，非常開心兼安心。最近，又見到古惑裝修佬喺隔離屋出入，呢種裝修師傅真係人見人怕，見到都要掉頭避開。