早幾日西報某專欄作家話在疫情之下多了一樣新嗜好，那就是在家後園觀鳥，話餵鳥器買完一個又一個，看見嘅雀鳥種類繁多，實在非常開心咁話。最近某歐洲研究報告也指出，在日常生活中遇到越多不同鳥類的人對生活和收入程度越滿意，詳細內容可以看看以下鏈結 – The importance of species diversity for human well-being in Europe （https://www.sciencedirect.com/science/article/pii/S0921800920322084）。

其實早在上年封城的時候已經發覺觀鳥是個不錯的玩意，多了時間在家自然多了時間往窗外看，慢慢看發現原來後園的雀鳥種類也有好幾種，例如金翅雀、鴿子、知更鳥、麻雀、北美紅雀、烏鴉，還有幾種不懂分辨等等。初初係幾好玩嘅，放的餵鳥器越來越多，來探訪的雀亦越來越多，最多的時候目測有百多二百隻，非常熱鬧。有一日，發現有啲唔對路，點解百幾二百隻都係麻雀，黃色好靚非常嬌小嘅金絲雀同埋英明神武嘅憤怒鳥northern cardinal去咗邊？

走去網上查資料，原來麻雀這傢伙幾霸道。在YouTube看到一段視頻，有兩隻麻雀想霸佔其他雀嘅竇，竟然一隻守住門口，一隻入去殺咗原本住開果隻，住開果隻想走都冇得走因為出口受阻，入面嘅麻雀做瓜咗住開果隻之後，一野啄起瓜咗果隻拋出門口。殘忍到呢，要霸個竇都算喇，點解要做瓜對方唔俾人走呢。

自此，對麻雀有點反感。有很多網友都提到麻雀過多的問題，網上也有很多方法敎人減少到訪麻雀的數量，例如放一些麻雀不喜歡的飼料等等，最簡單就是放少點飼料。呵呵，放很少飼料後，麻雀大哥們似乎感覺到自己不受歡迎，由百多二百隻縮到只有幾隻拜訪。過冬後，最近經常見到憤怒鳥，就係唔知道幾時會再見到黃色嘅金絲雀。

其實除了雀烏外，後園還有其他訪客，例如松鼠、灰兔、臭鼬、浣熊、還有不知那個鄰居養的貓。其中最有趣的是松鼠，每次見到核桃或花生，都會神神秘秘怱怱忙忙收起埋起來，只見松鼠來來回回走動，在泥土埋下食物後再用前肢拍實土地。聽講松鼠非常好記性，能夠記住自己在那裏埋下食物，看似隨意其實並不簡單。