燒臘店内有老鼠

話說某老人院隔離有個細嘅商場內有三間燒臘鋪,一個小商場竟然有三間燒臘鋪,可能附近住的老人家或街訪特別喜歡食燒味。三間都試過,各有特色。

第一間,有次買燒味問師傅攞啲汁,以為好小事,因為以前好多時候,買舊义燒都會請師傅澆少少汁,未撞過版,嗰次可能師傅心情唔多好,大大聲話啲汁冇益,唔比!如果啲汁冇益,可能佢啲燒味都冇乜益,自此以後都唔敢再幫襯。

第二間,味道唔錯,老板講嘢都幾風趣,老板娘就差一點,有時唔啋人,比較冇禮貌,不過又有可能係有聽覺問題。

第三間,老板幾有人情味,疫情至今,封城與否,從未關門休息,例假除外。記得疫情初期好多鋪頭關門,肯開門嘅不多,自此以後覺得呢間鋪頭啲生意多咗,經常有人在鋪頭外排隊。

以上見聞,排名不分先後,純熟個人經驗。

咁今次某間鋪頭出事,俾人影到有老鼠食豬皮,我覺得呢其實有很多食店都有鼠患,只不過係未俾人見到,未俾人影到。就同​​一個商場,很多年前某日早上,我走去買外賣點心,在等候過程中,距離幾尺地下有處供奉地主的神位,內有幾個生果,見到一隻大老鼠在吃生果,好似係蘋果,這個細節唔記得喇。那隻老鼠又唔怕人喎,佢有佢食,你有你等。回到家裡,望住幾盒點心,食唔食好呢?結果係食咗,那次沒有什麼大礙,以後有好多年冇再幫襯。如果係你,你會唔會食呢?

又有一次,好多好多年前去唐人街,行過一間賣煎餃還是什麼的,在橱窗外見到一隻大老鼠在吃煎餃還是窩貼,附近見唔到有店員,老鼠吃得很自在,當時沒有影相,畫面其實都幾嚇人。大家如果想食得安心,還是少食街嘢,多啲自己煮屋企飯。

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.