好多人都話移民加拿大好，諗諗下又係幾好嘅，尤其係福利方面。大大話話，移民過咗嚟幾十年，用過很多不同種類的服務，很多都是免費嘅。當然一利自有一弊，福利好，打稅又重一點。值得與否，見人見智。

記得第一晚落機跟親戚朋友食晚飯，餸菜很豐富，有一道菜是白切雞還是什麼的，記不清楚了，席間有長輩問覺唔覺得加拿大啲雞冇味，唔講唔覺，嗒真啲，又好似真係冇乜味。食食下又幾十年，現在已經唔記得香港啲雞係咩味。有時買隻Maple Leaf嘅雞（Maple Leaf Prime®Raised without Antibiotics）做蔥油雞，味道又唔錯，是不是現在的加拿大雞較以前嘅有味，這個我也不太清楚。不過有一樣我比較肯定，這裡的牛扒比香港的好食，差不多每個星期Longo’s都有特價牛扒賣。有時覺得見到特價牛扒唔買，有點對唔住自己，呵呵。

語言方面呢，你以為在加拿大生活工作或者讀書英文一定好好嘅話，那一定是有點誤會，在這裡英文唔好嘅比比皆是。尤其是生活在大城市如多倫多等，如果你選定生活在某個特定圈子和模式，你根本整日都唔洗講英文。有很多華人機構管理高層英文都好唔掂，以前有個老細，開會見到洋人會講唐話，話係話俾洋人認識一下自己中華文化，開會見到全部自己友華人呢，又會喜歡講英文，正確地說是言談間夾雜很多英文單字，好似要話俾人知老細佢係識好多英文嘅，不過係英文常用單字，真攞膽。需要見主流傳媒做訪問，大鑊！要講英文喎！馬上推啲喺度土生土長嘅出去，美其名是俾機會啲細嘅，其實是自己龜縮。有點规模的華人機構內裡或多或少可能也有幾件這樣的蛋散，如果唔好彩遇到，只有另謀對策靜候機會。

初到加拿大的朋友很多時候都希望盡快入鄉隨俗，有些以為揸住份Toronto Star報紙揸住杯Tim Horton咖啡辦下嘢就可以了，其實如果有心在這裡定居的話還是要多下一點功夫。語文要有一定程度，起碼要懂簡單溝通，多讀多寫多聽多講，有口音不重要，大城市如多倫多有很多不同種族不同文化，印度人講英文有印度人口音，意大利人講英文又有意大利人口音，講英文有口音只不過代表你還懂其他語言，語言只是一種工具，可以跟其他人溝通就可以了。普遍來說，在這裡工作或生活環境遇到的各類種族男女老少都尚算友善有禮，不認識的也會打招呼或閒談幾句，感覺上加拿大人比美國人友善。

還想到一樣事情，很多加拿大人喜歡自己做點維修攪點園藝，Home Depot或Rona等等有很多資訊提供，鋪頭內各個部門都有圖文並茂講解程序。簡單的當然可以自己攪掂，複雜的如果要找師傅幫手，除非有熟人介紹，否則盡量不要找分類廣告的，有些“師傅”志在收檢查費，似乎不會修理，以前中過幾次招。還有，如果要買電器傢俬，要留意有些公司貨品出門絕不退貨，未開過嘅都唔會退，大大個全版廣告嘅都唔好盡信。去到未入門口，已經可以見到一羣售貨員嚴陣以待，如獵犬守候獵物，一入門口，馬上人釘人，盡量帶你行去佢想你買的貨（不一定是你想買的款式或價錢）。唔好以為售貨員是自己友會對自己人好，那是公司策略，印度人售貨員對印度人顧客，華人售貨員對華人顧客，自己人對自己人是想同聲同氣，容易氹人落嗒，如此類推，策略還是一樣，盡快開單盡快收錢盡快送你出門口。這種舖頭似乎只打算做你一次生意就夠，有冇回頭客呢，有嘅都係仲未撞個版，撞過版嘅有嘢送都唔想去。

加拿大移民體驗就分享到這裡，有機會再分享一些種族歧視等見聞。