兄弟做開的非牟利政府資助機構最近又突然換了CEO，突然離職的前CEO是被炒還是炒機構魷魚呢，這個就無從知曉了，通常有好世界另謀高就的會事先張揚若干時間後就唔撈啦，無喇喇神神秘秘突然唔撈嘅可能是被炒的居多，當然也有可能自己發老脾突然辭職唔做的也有，不過如果你係CEO又上陽光榜又年薪廿萬，可能你唔會輕易發老脾唔做。

新的CEO上埸會否帶出一片新氣象呢，相信這是不少員工的盼望。新人事新作風，會否因應疫情影響經濟不景而縮減人手而裁員呢，可能部份員工會有這個顧慮。通常一朝天子一朝臣，變動是少不了的，只希望應炒則炒，如果輕信攙言應炒的唔炒，唔應炒的反而炒了，那就大事不妙了。

機構越大，冗员越多，通常有一批人是真正做嘢，大部分人是得過且過但求搵兩餐，正所謂多做多錯少做少錯唔做唔錯，還有幾個是阻住地球轉嘅。能夠阻住地球轉嘅通常是年資長嘅高級管理層，你以為年資長嘅一定有料到？不一定的，有很多年資長嘅連Budget Meeting開Excel也不會用也看不懂。莫講話疫情間Work From Home，没有疫情的時候已經是Work From Home，终日去向不明。唔做得嘢嘅高級管理層是如何生存的呢？只可說他們福大命大，深懂托大腳拍馬屁的真理，又會包裝自己整色整水，會做的事不多，但專長是打壓下属兼搶下属功勞，有事的時候不見人，冇事的時候會問你有什麼可以幫到你。試問如果新CEO上埸請教這樣的老臣子，機構的前景會有幾光明呢？

聽講新CEO的正職還是副業是做顧問，這個年頭很多人都話自己做顧問。上CEO的顧問服務網頁看看，服務範圍很廣好像什麼都會，網頁上人物介绍只有CEO自己一個，電郵聯絡似乎是CEO自己姓名的缩寫，又没有公司地址，是一人公司嗎？網頁上Testimonial推荐的部分所寫的東西又没有出處，什麼人什麼機構寫的也没有表明，自己寫俾自己寫乜都得喎。這位CEO是較為低調打算隱藏實力呢，還是係鱷魚頭老襯底無料到嘅呢？